Кончук, Салчак Баданович
Кончук Салчак Баданович (1912 чылдың декабрьның 18 — ?) — юрист, Тыва Арат Республиканың Дээди Шүүгү чериниң даргазы (1943—1944), ССРЭ-ниң Хүндүлүг демдек ордениниң эдилекчизи[1].
Допчу намдары
Салчак Баданович Кончук 1912 чылдың декабрьның 18-те Көөп-Сөөк сумузунуң Дөргүн деп черге арат өг-бүлеге төрүттүнген.
1934—1935 чылдарда ТАР-ның шериг кезээнге шериг албанын эрттирген.
1935—1938 чылдарда Москвага Чөөн чүктүң ажылчын чонунуң коммунистиг университединге (КУТВ-ка) өөренип турган.
Университет дооскан соонда Бии-Хем болган Улуг-Хем кожууннарның Иштики херектер яамызының органнарынга (НКВД-ге) ажылдап турган.
1941—1943 чылдарда Тыва Арат Республиканың прокурорунуң оралакчызы кылдыр ажылдаан.
1943 чылдың сентябрьда ТАР-ның Дээди шүүгү чериниң даргазынга томуйлаткан.
1944 чылда Тыва Арат Республика РСФСР-ниң составынче кирип турганы-биле ТАР-ның Дээди шүүгү черин Тыва Автономнуг Областьтың шүүгү чери кылдыр эде кылып эгелээни-биле албан-дужаалындан халашкан. Ооң орнунга Александр Бюрбюевич Даваа Областьтың шүүгү чериниң даргазынга томуйлаткан.
Ооң соонда Салчак Баданович РСФСР-ниң Юстициязының Тыва Автономнуг Областьты харыылаар Улусчу Коммисариадының Эргелелиниң начальнигиниң оралакчызы кылдыр ажылдап турган.
Ынчап кээрге, Баданович Кончук Тыва Арат Республиканың Дээди шүүгү чериниң сөөлгү даргазы болган.
Ооң соонда Кончук С.Б. дыка үр үе иштинде юстиция, прокуратура болгаш партия органнарынга ажылдап чораан.
Шаңналдары
ССРЭ-ниң Дээди Чөвүлелиниң Президиумунуң 1946 чылдың сентябрь 28-тен Доктаалы-биле ССРЭ-ниң социалистиг тургузуушкунунуң база камгалалының талазында онза ачы-хавыяазы дээш Кончук Салчак Баданович ССРЭ-ниң улуг шаңналы — Хүндүлүг демдек ордени-биле шаңнаткан.