Кара-сал, Борис Комбуй-оол оглу

Борис Комбуй-оол оглу Кара-сал
Альма-матер	Красноярсктың политехниктиг институдунуң Кызылда салбыры

Кара-сал Борис Комбуй-оолович (1957 чылдың ноябрьның 11) — техниктиг эртемнерниң доктору, доцент. Тыва Республиканың өөредилгезиниң алдарлыг ажылдакчызы (2004), Россия Федерациязының дээди профессионалдыг өөредилгезиниң хүндүлүг ажылдакчызы (2010).

Намдары

Тыва Республиканың Өвүр кожуунунуң Солчур суурунга 1957 чылдың ноябрь 11-де төрүттүнген.

1964—1972 чылдарда Өвүр кожууннуң Саглы суурунуң 8 чылдыг школазынга өөренип турган.

1972—1974 чылдарда Солчурнуң ортумак школазынга өөредилгезин уламчылаан.

1980 чылда Красноярсктың политехниктиг институдунуң Кызылда салбырының тудуг факультединиң «Үлетпүрлүг болгаш хамааты тудуг» деп эртемин доозуп алган.

1981—1985 чылдарда Ленинградтың инженер-тудуг институдунуң аспирантуразынга өөренип турган.

1985 чылда «Тываның казымал байлактарындан керамиктиг болгаш өске-даа тудуг материалдары» деп темага техниктиг эртемнериниң кандидат чадазын камгалап алган.

1985—1995 чылдарда Красноярсктың политехниктиг институдунуң Кызылда салбырының кафедразының ассистентизи, улуг башкызы, эргелекчизи

1996—2000 чылдарда — Тываның күрүне университединиң инженер-техниктиг факультединиң деканы.

2001—2008 чылдарда — Тываның күрүне университединиң экономика талазы-биле проректору.

2007 чылда — «Чавызаткан базыышкынга өртеткен керамиктиг материалдар» деп темага техниктиг эртемнерниң доктору деп эртем чадазын камгалап алган.

2009 чылдың марттан тура — Тываның күрүне университединиң «Үлетпүрлүг болгаш хамааты тудуг» кафедразының эргелекчизи.

Тыва Республиканың Өөредилге болгаш эртем яамызының тудуг талазы-биле эртем-техниктиг совединиң удуртукчузу.

Тыва Республиканың тудуг яамызының хөй-ниитичи совединиң удуртукчузу.

Тудуг материалдарынга хамаарышкан 120 ажыг эртем ажылдарының автору.

Өг-бүлези

Өөнүң ишти — Кара-сал Ирина Дарымаевна, география эртемнериниң кандидады, Тываның күрүне университединиң география кафедразының эргелекчизи.

Оглу — Эдуард, Тываның күрүне университединиң доозукчузу (2001 ч.), өг-бүлелиг, Тыва Республиканың Капиталдыг тудуг эргелелинде ажылдап чоруур.

Уруу — Милена, Москваның чер аайлажылга университединиң доозукчузу, юрист, бичии уруун кижизидип чоруур.

Шаңнал-макталы

Россия Федерациязының Өөредилге болгаш эртем яамызының хүндүлүг бижии (2001);

«Тыва Республиканың өөредилгезиниң алдарлыг ажылдакчызы» деп хүндүлүг ат (2004);

«Күш ажылчы чедиишкиннери» деп медал (2007);

Эртем болгаш техника талазы-биле Тыва Республиканың Чазааның Баштыңының Шаңналының эдилекчизи (2007);

«Россия Федерациязының дээди профессионалдыг өредилгезиниң хүндүлүг ажылдакчызы» деп хүндүлүг ат (2010).;

«Россия биле Тываның 100 чыл катыжыышкыны» деп медаль (2014);

Эртем болгаш техника талазы-биле Тыва Республиканың Чазааның Баштыңының Шаңналының эдилекчизи (2015);

«Профессионалдыг мергежили дээш» деп алдын медаль (2017).

Дөс

1. Кара-сал Борис Комбуй-оолович // Известные ученые. (https://famous-scientists.ru/16477/)
2. Патриот «Политеха» / Сост. Сергеева М. Н., Сарбаа Т. П., Бегзи М. Э., Монгуш А. К. — Кызыл: РИО ТувГУ. — 2008. — 43 с.