Куулар Герман Белекович
| Герман Куулар | |
|---|---|
 | |
| Кол медээлер | |
| Долу ады | |
| Төрүттүнген хүнү | 1962 апрельдиң 3 (64 года) |
| Төрүттүнген чери | |
| Чурту | |
| Мергежилдери | хөөмейжи |
| Идепкейлиг үези | 1976 — амгы. үе |
| Жанрлары | хөөмей-сыгыт[d] |
| Шаңналдары | Тыва Республиканың улустуң хөөмейжизи (2001) |
Герман Белекович Куулар (төр. 1962 апрельдиң 3, Дус-Даг, Тыва Автономнуг Совет Социалистиг Республика) — хөөмейжи, Тыва Республиканың улустуң хөөмейжизи (2001).
Допчу намдары
1962 чылдың апрель 3-те Тыва АССР-ниң Өвүр районунуң Дус-Даг суурга төрүттүнген. Школаны дооскаш, 1980 чылда Дус-Даг сумузунуң көдээ клувунга күш-ажылчы базымын эгелээн. Торгалыг суурнуң көдээ хөгжүм школазынга уругларга хөөмейни 1989 чылдан эгелеп өөредип эгелээннерниң бирээзи. Ол хөгжүм школазынга «Кара-Дуруяа» ансамблин организастаан. Ол-хөй чыл стажтыг башкы, ансамбльдиң солуттунмас удуртукчузу. Бо 25 чыл дургузунда хөөмейниң клазынга ол 62 доозукчуну кижизидип өстүрген[1]. Ооң өөреникчилери янзы-бүрү мөөрейлерге чаңгыс эвес удаа тиилеп келген.
Чогаадыкчы ажыл-чорудулгазы
Эге класстарның өөреникчизи тургаш-ла, бот-тывынгыр уран чүүл көрүлделеринге болгаш мөөрейлерге киржип эгелээн. Аныяк хөөмейжиниң баштайгы чедиишкини республиканың бот-тывынгыр чогаадылга көрүлдезинге чаалап алган 2 чер болган (1976). Ол «Буланныгның эдискизи» деп сураглыг ансамбльдин киржикчизи турган. 1988 чылда Бүгү-эвилелдиң ыраажылар болгаш хөгжүмчүлер маргылдаазынга Ашхабадка киришкеш, лауреат атты алган; 1993 чылда Амстердамга делегей чергелиг «Noan» деп опера төлевилелинге. Ол бүгү делегей чергелиг «Хөөмей» симпозиумнарынга үргүлчү шаңналдыг черлерни ап келген (үш дакпыр лауреат).
2001 чылда Откун Достайның болгаш Макигами Коичиниң чалааны-биле Японияда «Кырган-авай» деп төлевилелге киришкен[2]. 2001 чылдың январьда Тыва Республиканың Президентизиниң чарлыы-биле Герман Кууларга «Тыва Республиканың улустуң хөөмейжизи» деп хүндүлүг атты тывыскан.
Амгы үеде Герман Куулар Дус-Дагның уругларның хөгжүм школазында хөөмей клазынга башкылап турар. Ооң улуг оглу Мерген Куулар «Тыва Республиканың алдарлыг артизи», а хеймер оглу Откун Куулар республиканың уругларның хөөмей күүседикчилериниң «Хөөмейим кагбас-ла мен — 2012» мөөрейиниң I чергениң дипломантызы, «Сарадак-2013» делегей чергелиг мөөрейниң 1-ги чергениң лауреады[3].
Шаңналдары болгаш хүндүлүг аттары
- Республиканың бот-тывынгыр чогаадылга көрүлдезиниң II-ги чери (1976).
- Ашхабадка бүгү-эвилелдиң ыраажылар болгаш хөгжүмчүлер мөөрейиниң лауреады (1988)
- «Хөөмей» делегей симпозиумунуң Үш дакпыр лауреады.
- Тыва Республиканың улустуң хөөмейжизи (2001)
Демдеглелдер
- ↑ Сундуй Д. М. Легендарные ветераны-исполнители хоомея и их успехи (орус) // Итоги социологического исследования о развитии горлового пения хоомей Республики Тыва в 1992—2013 гг.. — Кызыл, 2013. — С. 42—50.
- ↑ Сузукей В. Ю., Ч. С. Тумат Герман Белекович Куулар (орус) // Хоомейжи Республики Тыва. — Кызыл, 2015. — С. 45.
- ↑ Сундуй М. М. Тувинское горловое пение. Некоторые тенденции развития исполнительской практики современных хоомейжи (орус) // ГУП «Тываполиграф». — Кызыл, 2003. — С. 30.