Сарыглар Алексей Ангыр-оолович
| Алексей Сарыглар | |
|---|---|
 | |
| Кол медээлер | |
| Долу ады | |
| Төрүттүнген хүнү | 1966 марттың 16 (60 лет) |
| Төрүттүнген чери | |
| Мергежилдери | хөөмейжи |
| Херекселдери | кеңгирге |
| Жанрлары | хөөмей |
| Коллективтери | Саяннар, Хүн-Хүртү |
| Шаңналдары | |
 Сарыглар Алексей Ангыр-оолович | |
Алексей Ангыр-оолович Сарыглар (төр. 1966 марттың 16, Барлык, Тыва Автономнуг Совет Социалистиг Республика) — хөөмейжи, Тыва Республиканың алдарлыг артизи (2009), Хүн-Хүртү бөлүүнүң вокализи, Тываның улустуң хөөмейжизи (2022).
Допчу намдары
Тыва АССР-ниң Барыын-Хемчик районунуң Барлык суурга 1966 чылдың март 16-да төрүттүнген[1]. Ол 7 харлыындан эгелеп, даайындан бызаанчы ойнаарын өөренип алган. 13-14 харлыындан хөөмейлеп эгелээн. 1983 чылда школаны дооскаш, бир чыл слесарь-моторист кылдыр ажылдаан. 1984 чылдан 1986 чылдарга чедир шериг албанын эрттирип турган[1]. Шериг хүлээлгезин эрттиргеш, Сүт-Хөл кожууннуң Суг-Аксы суурда ДК-га ажылдаан.
1987 чылда Улан-Удэ хоорайда Чөөн-Сибирьниң күрүнениң культура институдунче өөренип кирген, ооң-биле чергелештир билдингир «Сибирь суй-белээ» ансамблинге хөөмейжиниң артизи база барабанчы кылдыр ажылдаан[2]. 1992 чылда өг-бүлезиниң аайы-биле Кызылдың уран чүүл училищезинче шилчээн[2]. 1993 чылда училищени дооскаш, аңаа-ла соктаар хөгжүм херекселдериниң клазынга башкылап артып калган. 1994—1995 чылдарда Алексей Сарыглар Тываның күрүне филармониязынга «Саяннар» ансамблинге ажылдап чораан[1]. 1995 чылдан амгы үеге чедир «Хүн-Хүртү» ансамблиниң составында ажылдап турар.
IV-кү «Хөөмей Азия Төвүнде» деп делегей фестивалының үезинде хөй чылдар дургузунда «Хүн-Хүртү» ансамблиниң составынга хөөмейни болгаш ниитизи-биле тыва уран чүүлдү сайзырадырынга киирген үлүг-хуузу дээш Тываның улустуң хөөмейжизи атты алган.
Шаңналдары болгаш хүндүлүг аттары
- «Хову-Аксы-95» фестивальга Гран-при (1995).
- Тыва Республиканың алдарлыг артизи (2009).
- Тыва Республиканың улустуң хөөмейжизи (2022).
- Россия Федерациязының Президентизиниң өөрүп четтириишкини (2025 чылдың май 29) - культура болгаш уран чүүл адырында ачы-хавыяазы, хөй чылдарда үре-түңнелдиг ажыл-чорудулгазы дээш[3].
Демдеглелдер
- ↑ 1 2 3 Сузукей В. Ю., Ч. С. Тумат Алексей Ангыр-оолович Сарыглар (орус) // Хоомейжи Республики Тыва. — Кызыл, 2015. — С. 58.
- ↑ 1 2 Даргын-оол, Ч. Своей музыкой мы даём людям свободу и забираем чужую боль // Люди Центра Азии. — 2001. — Т. II. — С. 455—459.
- ↑ Распоряжение Президента Российской Федерации от 29 мая 2025 года № 199-рп «О поощрении» (рус.) (29 майның 2025). Хынаан ай-хүнү: 27 ноябрьның 2025.