Безруков Андрей Олегович

Рувики деп сайттан
Безруков Андрей Олегович
Bezrukov Photo Business.jpg
Өске ады Дональд Ховард Хитфилд
Төрүттүнген ай-хүнү 1960 августуң 30(1960-08-30) (66 лет)
Төрүттүнген чери
шериг аймаа Россия Федерациязының даштыкы тайбың албаны (СВР РФ)
Албан чылдары 1980 чылдардан 2010 чылдар
Эргези полковник
Шаңнал-макталдары
Орден «За заслуги перед Отечеством» 4-й степени
Орден Мужества SU Medal 70 Years of the Armed Forces of the USSR ribbon.svg Медаль «За отличие в военной службе» (СВР) I степени Медаль «За отличие в военной службе» (СВР) II степени
Медаль «За отличие в военной службе» (СВР) III степени
Харылзаалары Елена Вавилова — өөнүң ишти
Курлавырда ПАО «Роснефть» президентизиниң чөвүлеучизи (2011—2024), Технологтуг суверенитеттиң экспорт ассоциациязының президентизи, профессор (МГИМО)
Логотип РУВИКИ.Медиа Безруков Андрей Олегович

Андрей Олегович Безруков (төр. 1960 августуң 30, Канск[d], Красноярск край[d], ССРЭ) — Россияның хайгыылчызы, 2010 чылдан бээр Даштыкы хайгыыл албанының халажылгада полковниги. Амгы үеде «Роснефть» компаниязының президентизиниң чөвүлекчизи[1], МГИМО-нуң делегей айтырыгларының талазы-биле шинчилелдер кафедразының профессору[2], башкарыкчы политолог[3], «Валдай» деп дискуссия клувунуң эксперти[4], Даштыкы болгаш камгалал политиказының чөвүлелиниң кежигүнү, РФ ДОСААФ-тың Хайгаарал чөвүлелиниң кежигүнү[5], член Попечительского совета ДОСААФ РФ[6], «Аналитиктиг комитет» деп Россияның хөй-ниити организациязының даргазы.

Допчу намдары

Ол 1960 чылдың август 30-де Красноярск крайының Канск хоорайга төрүттүнген. Төрүттүнген соонда үр болбаанда ада-иези Кызыл хоорайже көже берген. Андрейниң чаш үези Кызылга эрткен. Школазын база аңаа дооскан. 1978 чылдан 1983 чылга чедир Томскунуң күрүне университединге «төөгү» мергежилинге өөренип тургаш, келир үедеги өөнүң ишти-биле таныжып алган.

Ол Дональд Ховард Хитфилд (англ. Donald Howard Heathfield) деп меге ат-биле, өөнүң ишти Елена Вавилова-биле (ол Трейси Ли Энн Фоули / англ. Tracey Lee Ann Foley деп меге аттыг турган) кады 20 чыл ажыг дургузунда Россиядан дашкаар черге чурттап, чажыт хайгыыл ажылын чорудуруп турган. Чогаадып берген төөгүзү ёзугаар Хитфилд — школаны Чехияга дооскан канад дипломаттың оглу болур. Ынчалза-даа ол дипломаттың ёзулуг шын оглу 1962 чылда төрүттүнгеш, 7 неделя болганда чок апарган турган[7][8]. Гарвардка кады өөренип турган эштериниң бирээзиниң демдеглээни-биле, Хитфилд бодунуң чаңгыс курсчулары-биле үргүлчү харылзаа тудуп, оларның чуртталгазын сонуургаар турган. Оларның аразында Мексиканың келир үедеги президентизи Фелипе Кальдерон база турган. Вавиловага хамаарыштыр чогаадып каан төөгүде ону 1962 чылда Монреальга төрүттүнген деп айтыткан.

Ол 1992—1995 чылдарда Канаданың Йорк университединге өөренгеш, ону делегей экономиказының бакалавры деп эртем чадазы-биле дооскан. 1995—1997 чылдарда Парижтиң Көвүрүглер болгаш оруктарның национал школазынга (Парижтиң бизнес-школазы) өөредилгезин уламчылап, делегей бизнезиниң магистри (англ. Master in International Business) деп эртем чадазын алган. 1999 чылдан эгелеп АКШ-ка чурттай берген. 2000 чылда Гарвард университединиң чанында Джон Кеннеди аттыг Башкарылга школазын күрүне болгаш ниитилел башкарылгазының магистри деп эртем чадазы-биле доозуп алган.

2000 чылдың майдан 2006 чылдың майга чедир «Global Partners Inc.» деп консалтинг компаниязының партнёру бооп ажылдаан. Ооң клиентилериниң аразында Alstom, Boston Scientific, General Electric болгаш T-Mobile дээн ышкаш сураглыг компаниялар турган[9]. 2006 чылдың майдан 2010 чылдың декабрьга чедир «Future Map» деп өске бир консалтинг компаниязын удуртуп турган. Парижте болгаш Сингапурда салбырларлыг ол компания күрүне структураларынга болгаш улуг корпорацияларга стратегтиг баш бурунгаар санаашкын болгаш планнаашкын системаларын ажылдап кылгаш, киирип турган.

Безруков «World Future Society» (очул. Делегейниң келир үе ниитилели) деп организацияның кежигүнү турган. «Boston Herald» солуну ол ниитилелди «чаа технологияларның бодалдар фабриказы» деп, а ооң конференцияларын «күрүне башкарылгазының кол специалистери чыглыр чер» деп тодараткан. Ооң ачызында Хитфилд хөй-хөй улус-биле таныжып, харылзаа тудуп ап шыдаан. Чижээ, вице-президент Альберт Горнуң национал айыыл чок чорук айтырыгларының талазы-биле чөвүлекчизи турган Леон Фуэрт-биле база Джордж Вашингтон аттыг университеттиң менеджмент профессору Уильям Халал-биле таныш турган. Олар 2008 чылда «World Future Society» конференциязынга киришкен.

Халал Хитфилд-биле бодунуң харылзааларын чылыг-чымчак деп демдеглээн: «Мен ооң-биле чаңгыс эвес удаа хемчеглерге, ооң иштинде федералдыг агентилелдерге болган хуралдарга, „бодал фабрикаларының“ шөлчүгештеринге база World Future Society-ге таваржып турган мен. Ынчалза-даа айыыл чок чорук талазы-биле сонуургал тургузуп болур кандыг-даа медээ менде чок. Мээң Дон-биле үлежип турган медээлеримниң шуптузу парлалгаже үнген болгаш ону интернеттен тып ап болур турган».

Безруков өөнүң ишти-биле кады Массачусетс штадының Кембридж хоорайга чурттап турган. Елена Вавилова ол үеде Канадада Макгилл аттыг университетти доозуп алган турган. АКШ-ка чурттай бээриниң мурнунда Францияга чоруп турган. Ол Массачусетс штадының Соммервилл хоорайда «Redfin» деп риелтор агентилелинге ажылдавышаан, Францияже тускай вино турларын база оргазанистап турган[8].

Даштыкы хайгыыл албанының полковниги турган, дайзынның талазынче дескен саттыныкчы Александр Потеев деп кижи ооң болгаш өске-даа хөй хайгыылчыларның ат‑сывын, турар черин дужаап берипкен. 2010 чылдың июньда ону АКШ-ка тудуп хоругдаан. Ол-ла чылдың июль 9-та Венага Безруковту чажыт хайгыыл ажылын чорудуп турган өске 9 российжилер-биле кады төрээн черинге хоругдалга олурган Россияның дөрт хамаатызынга орнап алган.

Россияже чанып келген соонда, Безруковту «Роснефть» президентизиниң чөвүлекчизи кылдыр томуйлаан[1]. Ооң-биле чергелештир МГИМО-нуң делегей айтырыгларының талазы-биле шинчилелдер кафедразының профессору болуп ажылдап турар[2]. Даштыкы болгаш камгалал политиказының чөвүлелиниң (ДККП) Президиумунуң кежигүнү[5]. 2018 чылдың август айдан эгелеп, ол Технологтуг Суверенитет Экспорт Ассоциациязының (Бедик Технологтуг Экспорт Хөгжүлдезин Деткиир Ассоциация) президентизиниң албан-дужаалын ээлеп турар.

2024 чылдың ноябрьдан эгелеп — «Планир» ООО-нуң генералдыг директору (программа хандырылгазы).

2016 чылда ол А. Сушенцов-биле кады «Россия и мир в 2020 году. Контуры тревожного будущего» деп номну бижээн. 2017—2018 чылдарда «Известия» солунга рубриканы бижип турган.

Чанып келгеш бир дугаар интервьюзун 2012 чылда «Русский репортёр» сеткүүлге берген. 2015 чылда «Россия-1» телеканалының «Сергей Брилёв-биле субботада медээлер» деп программазының аалчызы болган. 2016 чылдың ноябрь 5-те даштыкы чуртка чорааш, АКШ президентизиниң соңгулдаларының бүдүүзүнде «Россия-1» телеканалынга скайп таварыштыр интервью берген. Ынчалза-даа теле-башкарыкчы Сергей Брилёв чугаалашкан кижизиниң дилээни-биле, полковник Безруковтуң харылзааже кайы күрүнеден үнүп келгенин чонга ажыы-биле чугаалап шыдавазын демдеглээн.

Безруков «Вести ФМ» радио станциязының «Утканың формулазы» деп программазының болгаш өске-даа дамчыдылгаларының, база «Россия-1» телеканалының «60 минут» деп ток-шоузунуң доктаамал аалчызы болур[10][11]. Оон аңгыда ол Россияның сигара эвилелиниң кежигүнү болуп, ооң хемчеглеринге идепкейлиг киржип турар[12].

Санкциялар

2023 чылдың январь 15-те Украинада тускайлаттынган шуриг операциязынга хамаарышкан санкциялар даңзызынче ону киирген. Украинаже кирерин хоруурундан аңгыда, ында чуртта активтерни доңурары, экономиктиг болгаш саң-хөө хүлээлгелерин соксадыр, культурлуг солчулгаларны болгаш кады ажылдажылганы соксадыр, украин күрүне шаңналдарын чидирери кирип турар.

Өг-бүлези

Өөнүң ишти — Елена Вавилова, чажыт хайгыылчы, Даштыкы хайгыыл албанының халажылгада полковниги (2010 чылдан бээр). Амгы үеде «Норильский никель» АН-де (ажык ниитилелде) ажылдап турар. Ажы-төлү — Тим (Тимофей) (1990) база Алекс (Александр) (1994)[13]. 2019 чылдың декабрь 19-та Оттаваның Дээди Суду оларны Каданың хамаатылары дээрзин бадыткаан.

Елена Вавилова (также англ. Tracey Lee Ann Foley)

Шаңналдары

  • «Ада-чурттуң мурнунга ачы-хавыяазы дээш» IV чергениң ордени,
  • «Эрес-дидим чорук» ордени дээш өске-даа медальдар-биле шаңнаткан.
  • * «Шеригжи ачы-хавыяазы дээш»[14],
  • медальдар.

Библиография

Демдеглелдер

  1. ↑ 1 2 Андрей Безруков. Росконгресс. Хынаан ай-хүнү: 12 январьның 2026.
  2. ↑ 1 2 Безруков Андрей Олегович. mgimo.ru. Хынаан ай-хүнү: 13 декабрьның 2016. Архивтээн 20 декабрьның 2016 года.
  3. ↑ Андрей Безруков: «В Америке крепнет понимание: не туда идем». portal-kultura.ru. Хынаан ай-хүнү: 13 декабрьның 2016. Архивтээн 20 декабрьның 2016 года.
  4. ↑ Андрей Безруков (орус), Клуб «Валдай». Архивтээн 2017 февральдың 2. Хынаан 25 январьның 2017.
  5. ↑ 1 2 Президиум СВОП. Совет по внешней и оборонной политике. Хынаан ай-хүнү: 12 январьның 2026.
  6. ↑ Попечительский совет | ДОСААФ России | Официальный сайт. Хынаан ай-хүнү: 2 апрельдиң 2019. Архивтээн 5 январьның 2020 года.
  7. ↑ Русские шпионы оказались опасными. ФБР решилось провести скандальные аресты российских нелегалов после того, как те начали вплотную подбираться к представителям высших эшелонов американской власти. Interfax (1 ноябрьның 2011). — «Так, агент СВР Андрей Безруков проживал в Массачусетсе под именем Дональда Хитфилда — канадского мальчика, скончавшегося несколько десятилетий назад.» Хынаан ай-хүнү: 19 январьның 2026. Архивтээн 9 октябрьның 2016 года.
  8. ↑ 1 2 Фабрис Де Пьербург. Нелегалы из Москвы. Российские спецслужбы узурпировали личность младенца Дональда Говарда Хитфилда, похороненного рядом с бабушками и дедушками на маленьком монреальском кладбище. LaPresse.ca. ИноСМИ.Ru (6 декабрьның 2012). Хынаан ай-хүнү: 19 январьның 2026. Архивтээн 10 октябрьның 2016 года.
  9. ↑ Кирилл Мельников. Выбор разведчицы: между жизнью и нефтью. Одна из героинь шпионского скандала в США Наталья Переверзева трудоустроена в «Транснефть». «Коммерсантъ» №2 (12 январьның 2011). Хынаан ай-хүнү: 19 январьның 2026. Архивтээн 11 апрельдиң 2017 года.
  10. ↑ Андрей Безруков на радио Вести ФМ. Хынаан ай-хүнү: 26 январьның 2026. Архивтээн 6 февральдың 2022 года.
  11. ↑ 60 минут. Эфир от 22.12.2016 (рус.). Хынаан ай-хүнү: 20 январьның 2026. Архивтээн 6 февральдың 2022 года.
  12. ↑ Список фотографий - Cigarinfo (рус.). www.cigarinfo.ru. Хынаан ай-хүнү: 20 январьның 2026. Архивтээн 2 февральдың 2017 года.
  13. ↑ Иннокентий Пешков. Почему шпионы похожи на ученых. «Русский репортёр» №40 (269) (октябрь 2012). Хынаан ай-хүнү: 7 октябрьның 2016. Архивтээн 7 июльдуң 2016 года.
  14. ↑ Безруков Андрей Олегович. Совет по внешней и оборонной политике. Хынаан ай-хүнү: 20 январьның 2026.

Шөлүлгелер

Дөзү – «https://tyv.ruwiki.ru/w/index.php?title=Безруков_Андрей_Олегович&oldid=339967»