Дажы-Саң Оюн Шириин оглу
| Дажы-Саң Оюн Шириин оглу | |
|---|---|
| тыв. Дажы-Саң Оюн Шириин оглу | |
| Төрүттүнгенде ады | Оюн Шириин оглу Дажы-Саң |
| Төрүттүнген ай-хүнү | 1914 |
| Төрүттүнген чери | Чагытай, Межегей сумузу, Таңды, Урянхай край |
| Мөчээн ай-хүнү | 1966 |
| Мөчээн чери | Таңды, Тыва АССР |
Дажы-Саң Оюн Шириин оглу (төрүттүнгенде ады — Оюн Шириин оглу Дажы-Саң, орус. Дажы-Саң Оюн Шириинович, 1914 чыл — 1966 чыл) — Ада-чурттуң Улуг дайынының киржикчизи, тыва эки турачы эскадроннуң 1-ги взводунуң 2-ги салбырының анаа дайынчызы, ТАР-ның Күш-ажылының ордениниң эдилекчизи[1].
Допчу намдары
Дажы-Саң Оюн Шириин огул 1914 чылда Урянхай крайның Таңдының Межегей сумузунуң Чагытайга төрүттүнген.
1935-1937 чылдарда Тыва Арат Революстуг Шеригге шериг албанын эрттирип турган.
1940 чылдан Тыва Арат Революстуг Намның кежигүнү.
Ада-чурттуң улуг дайынынга киржилдези
Тыва Арат Революстуг Намның Төп комитединиң секретариадының 1943 чылдың август 25-тен шиитпири-биле 1-ги тыва эки турачы отрядтың 1-ги взводунуң 2-ги салбырының анаа дайынчызы кылдыр томуйлаткан.
Тыва Арат Республикадан тыва эки турачылар отряды Барыын фронтунуң 6-гы аъттыг корпузунуң Морозов аттыг 8-ки гвардейжи аъттыг Ровно дивизиязының 31-ги гвардейжи аъттыг полкунуң составынче 4-кү эскадрон кылдыр кирген. Ооң составында 1000 километр орук чок черге 45 хонук дургузунда агаар-бойдус талазы-биле кончуг берге байдалдарда чоруп келген. Марш үезинде тывалар кижи-даа, аът-даа талазы-биле чидириг чок турган. Тыва чылгычылар походка шыдамык чоруун көргүскеннер.
1944 чылдың январьның 29-та 4-кү эскадроннуң тыва аъттыг шериглери Украин ССР-ниң Ровно облазының Деражно суур дээш тулчуушкуннарга баштай киришкен болгаш халдаашкынга төлептиг үлегер-чижекни көргүскен.
Украин ССР-ниң Ровно база Дубно хоорайларын хостаарынга эрес-дидим киришкен.
Дайын соонда
Тайбың үеде колхоз тургузуушкунунуң идепкейлиг киржикчизи. Хой чылдарда Таңдынын «Кызыл партизан» колхозунга малчыннап чораан.
1966 чылда мөчээн.
Шаңнал-макталдары
- ТАР-ның Күш-ажылының ордени (1944)
Литература
- Сундуй М. Б. Эки турачы аъттыг эскадрон. Кызыл: Тываның ном үндурер чери, 1989.
- Пивоваров В. Добровольцы. Кызыл, 1990.
- ДАЖЫ-САН Оюн Шириинович / Урянхайско-тувинская энциклопедия. I том (А-К). Под общей ред. Шойгу С.К., отв. ред. Бичелдей К.А. Кызыл: "Мир тувинцев", 2021. С. 275.
Демдеглелдер
- ↑ ДАЖЫ-САН Оюн Шириинович / Урянхайско-тувинская энциклопедия. Кызыл: "Мир тувинцев", 2021. С. 275.