Соспукай Саая Медип оглу
| Соспукай Саая Медип оглу | |
|---|---|
| тыв. Соспукай Саая Медип оглу | |
| Төрүттүнгенде ады | Саая Медип оглу Соспукай |
| Төрүттүнген ай-хүнү | 1918 |
| Төрүттүнген чери | Эрги-Барлык, Даа кожуун, Урянхай край |
| Мөчээн ай-хүнү | 1968 |
| Мөчээн чери | Хову-Аксы, Чеди-Хөл кожууну, Тыва АССР |
Соспукай Саая Медип оглу (төрүттүнгенде ады — Саая Медип оглу Соспукай, орус. Соспукай Саая Медипович, 1918 чыл — 1968 чыл) — Ада-чурттуң Улуг дайынының киржикчизи, улуг лейтенант, тыва эки турачы эскадроннуң 1-ги взводунуң гвардияның анаа дайынчызы, ТАР-ның ордениниң (1944), 1-ги чаданың Ада-чурттуң Улуг дайынының ордениниң (1944) эдилекчизи.
Допчу намдары
Соспукай Саая Медип оглу Урянхай крайның Даа кожуунунуң Эрги-Барлык деп черге төрүттүнген.
1940 чылда Кызылдың көдээ ажыл-агый техникумун дооскан.
Ада-чурттуң улуг дайынынга киржилдези
Тыва Арат Революстуг Намның Төп комитединиң секретариадының 1943 чылдың август 25-тен шиитпири-биле 1-ги тыва эки турачы отрядтың 1-ги взводунуң анаа дайынчызы кылдыр томуйлаткан.
Тыва Арат Республикадан тыва эки турачылар отряды Барыын фронтунуң 6-гы аъттыг корпузунуң Морозов аттыг 8-ки гвардейжи аъттыг Ровно дивизиязының 31-ги гвардейжи аъттыг полкунуң составынче 4-кү эскадрон кылдыр кирген. Ооң составында 1000 километр орук чок черге 45 хонук дургузунда агаар-бойдус талазы-биле кончуг берге байдалдарда чоруп келген. Марш үезинде тывалар кижи-даа, аът-даа талазы-биле чидириг чок турган. Тыва чылгычылар походка шыдамык чоруун көргүскеннер.
1944 чылдың январьның 29-та 4-кү эскадроннуң тыва аъттыг шериглери Украин ССР-ниң Ровно облазының Деражно суур дээш тулчуушкуннарга баштай киришкен болгаш халдаашкынга төлептиг үлегер-чижекни көргүскен.
Ровно облазының өске-даа хоорай-суурларын хостаар тулчуушкуннарга эрес-дидимин чаңгыс эвес удаа көргүзүп турган.
Дайын соонда
Дайындан онча-менди чанып келгеш, Сүт-Хөлдүң райкүүкомунуң аппарадынга Тес-Хем кожуунга нам адырынга ажылдап чораан. 1968 чылда Хову-Аксы суурга чок болган[1].
Сактыышкын
Шаңнал-макталдары
- ТАР-ның ордени (1944)
- 1-ги чаданың Ада-чурттуң Улуг дайынының ордени (1944).
Литература
- Сундуй М. Б. Эки турачы аъттыг эскадрон. Кызыл: Тываның ном үндурер чери, 1989.
- СОСПУКАЙ Саая Медип оглу/ Урянхайско-тувинская энциклопедия. II том (Л-Я). Под общей ред. Шойгу С.К., отв. ред. Бичелдей К.А. Кызыл: "Мир тувинцев", 2021. С. 347.