Сүт-Хөл
| Хөл | |
| Сүт-Хөл | |
|---|---|
.jpg) 2012 чылдың декабрь 12-де Сүт-Хөлдүң барыын талазындан аэрофоточурук | |
| Морфометриязы | |
| Высота над уровнем моря | 1815[1] м |
| Хемчээлдери | 7 × 2,5 км |
| Шөлү | 13,3[2] км² |
| Эң ханы чери | 148[3] м |
| Ортумак ханызы | 25 м |
| Гидрология | |
| Минералдыг хевири | дус чок |
| Бассейни | |
| Площадь бассейна | 72[2] км² |
| Вытекающая река | Хөл-Ыяш |
| Водная система | Хөл-Ыяш → Чес-Булуң → Хемчик → Саян-Шушенск водохранилище → Улуг-Хем → Карск далай |
| Турар чери | |
| Страна | |
| РФ-тиң субъектизи | Тыва |
| Район | Сүт-Хөл кожуун |
| Идентификаторы | |
| Код в ГВР: 17010300111116100000909[4] | |
| Регистрационный номер в ГКГН: 0563536 | |
 | |
| Заповедник девискээр | |
| Сүт-Хөл[5] | |
| Категория МСОП | III (Памятник природы) |
| Профиль | ландшафтылыг, рекреациялыг |
| Шөлү | 3 793,7 га |
Сүт-Хөл[1][6][7] (орус. Сут-Холь[2][7]) — Тыва Республиканың Сүт-Хөл кожуунда хөл[5].
Адының утказы
Хөлдүң ады тыва дылда «сүт» деп сөстен укталган. Тыва чонга Сүт-Хөл ыдыктыг хөл болуп турар, а тываларга сүт дээрге арыг чүүлдүң демдээ болур[8].
Географтыг туружу
Хөл Барыын Саянның мурнуу кезээнде, Алаш шаттың мурнуу-чөөн кезээнде турар. Хөл чоогунда Бора-Тайга деп даг бар. Хөлдүң мурнуу чүгүнде Тываларның ыдыктыг даа Кызыл-Тайга бар, ол хөлдү Хемчик ыйгылаажындан аңгылап турар. Хөлдү дыттыг, шивилиг база пөштүг тайга долганган[8].
Географтыг шынарлары
Хөл далай деңнелинден 1814 метр бедикте турар. Шын эвес хевирлиг, соңгу-чөөн чүкче шөйүлген. Хөлдүң узуну 7-8 километр, дооразы-2-3 километр, шөлү — 13,30 км²[5], эң тереңи 35 метр болур[9], өске медээлер-биле алырга — 148 метр[3]. Хар, чаъс болгаш меңгиден суг ап турар. Хөлдүң дүвү шала иемдик. Хөлдүң эрик чоогу сайлыг, а хөлдүң ханы суг кезээ довурактыг. Хөлдүң суу сыык кезээниң дүвүнде чыдар черлери элезин холумактыг үүрмек сайлыг, чамдык черлери база довурактыг[3].
Киир база үндүр аккан хемнер
Хөлдүң соңгу-барыын талазындан ынаар бичии кадып чыдар кара-суг киир агып чыдар, барыын талазында Улуг-Ажык деп ер уну-биле агып чыдар улуг эвес хемчигеш киир агып чыдар. Хөлдүң суу доктаамал эвес, мурнуу-чөөн талазында Коль-Isi (База Хөл-Оожу) хем агып чыдар. Хемниң үнер дөзүнден ырак эвесте элээн каш шуралгактарны тургузуп турар[1][8].
Суг реестриниң медээлери
Россияның күрүнениң суг реестриниң медээзи-биле алырга, Улуг-Хем бассейн округунга хамааржыр. Хөлдүң хем бассейни — Улуг-Хем, биче хем бассейни — Улуг-Хемниң Бии-Хем биле Каа-Хемниң каттышкан белдиринден Ангараның кирген черинге чедир. Суг ажыл-агый участогу — Улуг-Хемниң эге бажындан Саян-Шушенск гидроузелинге чедир[2].
Күрүнениң суг реестринде объект коду — 17010300111116100000909[2].
Үнүш болгаш аң-мең делегейи
Хөлде чамдык балыктарга чем болуп турар хөй санныг планктон — бопоплавтар чурттап турар. Байкалдың омулюнуң, Моолдуң кадыргызының, пелядьтың, рипустуң, репушканың байлаңнары-биле хөлдү болбаазырадып турган[8].
Онза чолун черлери
Хөлден ырак эвесте ыдыктыг деп санаттынып турар аржаан Улуг-Дөргүн (Шаараш) бар. Ында сугнуң температуразы +4,2 °C. Аржаан ыдыктыг деп санаттынар, тывалар аңаа даглар ээлеринге өргүлдер кылыр, чанында турар ыяштарга тускай кожааларны азып турар. Аржаанның суу тыныш, күш-дамыр болгаш эндокринниг системаларның аарыгларындан дузалаар[10]. Чайын Улуг-Дөргүнге туристер бо-ла кээр[8].
Камгалалы
Сүт-Хөлдү долгандыр 22,76 км² шөлдүг онза камгалалдыг бойдус девискээри турар. Хөлдү бүгү талазындан 1 километр долгандыр турар бо зонаның тургузуунче 200 метр радиустуг суг камгалаар зона база кирип турар. Суг камгалаар зонага хоруглуг чүүлдер:
• ыяш белеткээри, черни аңдарары, девискээрни бокталдырары азы тураскаалдың бойдустан чаяаттынган байдалынга кандыг-бир өске каража-когаралды чедирери;
• хөл эриктерин үрегдээри, эрик кыдыын камгалаары, суг болгаш малгаштыг үнүштерни узуткаары;
• орук даштынга автотранспорт шимчээшкини, хөл эриинден 100 метрден чоок автомобильдер, мотоциклдер болгаш өске-даа машиналар турары;
• чер кырының сугларының деңнелиниң өскерлири болгаш хөрзүннүң үрелири-биле холбашкан ажылдарны чорудары, чаа оруктарны шөери;
• мал одарладыры, тускай аңгылаан черлерден аңгыда, хөлдү суггат кылдыр ажыглаары.
Чөпшээреттинген чүүлдер:
• доктааттынган черлерге чоннуң дыштанылгазы;
• бадылаттынган квота ёзугаар балык тудары;
• дуюглуг черлик дириг амытаннарны, суг куштарын болгаш черлик хаванны, өлүк аңнарын доктааткан үеде аңнаары[5].
Тоолчургу чугаалар
Тывалар Сүт-Хөлдү ыдыктыг деп санаар. Маңаа эштип, хөлдү база ооң эриин хирлендирип болбас. Хөлдүң дыжын үрээрге, диңмирээшкин-кызаңнааштыг чаъс-чайык болур. Тус черниң чурттакчылары хөл дугайында тоолчургу чугааны чугаалап чоруурлар:
Шаанда шагда хөл кыдыынга илби-шидичи кадай чурттап чораан. Ол Сүт-Хөлдүң кыдыында өзүп турар оъттардан эм оъттарны хайындырып, алгыш-йөрээлди чугаалап, тайгаже диңмирээшкин-кызаңнаашкынны чорудуп турган. Бир-ле катап илби-шидичи Сүт-Хөлдүң суунче бир паш сүт чажыпкан. Эртенинде улус хөлдү танывайн барган: ол сүт долган чүве дег, маңган ак апарган. Оон бээр Сүт-Хөлдүң одарында инектер сүт өреме дег хоюг сүттен хөйнү берип турарын чон эскерип эгелээн.
Өске тоолчургу чугаа-биле алырга, Сүт-Хөлдүң суунга хуулгаазын аң — бир буга чурттап турган. Бир катап ол хөлден үнгеш, кижилерни аарыг-аржыктан камгалаар дээш, олар-биле бодунуң ханын үлежип турган. Амгы үеде буганың хөлден үнери ховартаан. Кажан ол чер кырынга көстүп кээрге, хөлге күштүг хөлзээшкин, дыңзыг хат хадып эгелээр[8].
Ажыл-агый чорудулгазы болгаш туризм
Чайгы үеде хөл чоогунга малчыннарның чайлаглары турар. Амгы үеде хөл чоогунда туризм сайзырап турар[10].
Демдеглелдер
- ↑ 1 2 3 Лист карты M-46-15-A — ФГУП «ГОСГИСЦЕНТР»
- ↑ 1 2 3 4 5 Озеро Сют-холь : [рус.] / textual.ru // Государственный водный реестр : [арх. 15 октября 2013] / Министерство природных ресурсов и экологии Российской Федерации. — 2009. — 29 марта.
- ↑ 1 2 3 Е. Н. Ялышева. Распростарнение зообентоза в пресноводных озёрах Тувы (рус.). metodichka.x-pdf.ru. Хынаан ай-хүнү: 10 апрельдиң 2019. Архивтээн 19 январьның 2019 года.
- ↑ Ресурсы поверхностных вод СССР: Гидрологическая изученность. Т. 16. Ангаро-Енисейский район. Вып. 1. Енисей / под ред. Г. С. Карабаева. — Л.: Гидрометеоиздат, 1967. — 823 с.
- ↑ 1 2 3 4 Озеро Сут-Холь (рус.). — Информация об ООПТ на сайте информационно-аналитической системы «Особо охраняемые природные территории России» (ИАС «ООПТ РФ»): oopt.aari.ru. Хынаан ай-хүнү: 11 марттың 2018.
- ↑ Сут-Холь (№ 0563536) / Реестр наименований географических объектов на территорию Республики Тыва по состоянию на 20.12.2017 // Государственный каталог географических названий / rosreestr.ru.
- ↑ 1 2 Сут-Холь // Словарь названий гидрографических объектов России и других стран — членов СНГ / под ред. Г. И. Донидзе. — М.: Картгеоцентр — Геодезиздат, 1999. — ISBN 5-86066-017-0.
- ↑ 1 2 3 4 5 6 Озеро Сут-Холь (молочное озеро) (рус.). sib-guide.ru. Хынаан ай-хүнү: 10 апрельдиң 2019. Архивтээн 8 январьның 2017 года.
- ↑ Озеро Сут-Холь. www.russia-open.com. Хынаан ай-хүнү: 10 апрельдиң 2019. Архивтээн 3 майның 2019 года.
- ↑ 1 2 Туристическая Тува: Священный Сут-Холь (рус.). plusinform.ru. Хынаан ай-хүнү: 10 апрельдиң 2019. Архивтээн дөзү оригинала 12 апрельдиң 2019 чылда.