Ховалыг, Владислав Товарищтай оглу

Владислав Товарищтай оглу Ховалыг
Владислав Товарищтай оглу Ховалыг
	Владислав Товарищтай оглу Ховалыг
Төрүттүнген ай-хүнү	1967 декабрьның 24 (56 хар)
Төрүттүнген чери	Тээли, Тыва Автономнуг Совет Социалистиг Республика, РСФСР[d], ССРЭ;
Ажыл-херээ	политик
	Владислав Товарищтай оглу Ховалыг

Шынзыттынган чүүл

Владислав Товарищтай оглу Ховалыг (орус. Владисла́в Товарищта́евич Ховалыг; 1967 чылдың декабрьның 24) – Россияның күрүне ажылдакчызы. 2021 чылдың апрельдиң 7-ден Тыва Республиканың Чазааның даргазы - Тываның Баштыңының албан-дужаалын күүседип турар^[1]. Россия Федерациязының күрүнениң хамааты албанының 1-ги клазының чөвүлекчизи.

Допчу намдары

Владислав Товарищтай оглу Ховалыг 1967 чылдың декабрь 24-те Тыва АССР-ниң Бай-Тайга кожуунунуң Тээли суурунга төрүттүнген ^[2].

1986-1988 чылдарда ССРЭ-ниң Чеспектиг күштеринге шериг албанын эрттирген.

1988 чылда Шагаан-Арыгга районнуң аъш-чем комитединге ажылдап эгелээн.

1992 чылда ол Красноярскының күрүне университединге "юриспруденция" мергежилин өөренген. 2006 чылда Россияның Президентизиниң чанында Россияның Күрүне албанының академиязын «Кризиске удур башкарылга» деп мергежилдиг дооскан.

Университет дооскан соонда эрге-чагырга органнарынга ажылдап эгелээн, Тыва Республиканың Эт-хөреңги күрүне комитединиң эргеге хамаарышкан айтырыгларын харыылаар кол специалист кылдыр, Кызыл хоорайның Төлээлекчилер хуралының депутады кылдыр ажылдап чораан.

1994 чылдан 2004 чылга чедир Тывада саң-хөө экижидер болгаш банкротство талазы-биле федералдыг албан чериниң тус черде салбырын баштап ажылдап турган.

Ооң соонда Тыва Республиканың Саң-хөө яамызынче ажылдап киргеш, аңаа отдел даргалап, департамент начальниги кылдыр ажылдаан.

2007 чылдың апрельден 2008 чылдың июльга чедир Тыва Республиканың Чер болгаш өнчү-хөреңги хамаарылгаларының яамызының сайыды.

2008 чылдың июль 30-ден 2018 чылдың ноябрь 1-ге чедир — Кызыл хоорайның чагырыкчызы ^[3].

2018 чылдың ноябрь 9-тан 2021 чылдың апрель 7-ге чедир «Тываэнергосбыт» компаниязының генералдыг директору.

2021 чылдың апрель 7-ден Тыва Республиканың Чазааның даргазы - Тываның Баштыңының хүлээлгезин күүседип турган ^[4]. 2021 чылдың сентябрь 19-та Тываның Баштыңының соңгулдаларынга Ховалыг соңгукчуларның 86,81% үннерин алгаш, Тываның Баштыңынга соңгуткан. Албан хүлээлгезин 2021 чылдың сентябрь 28-те күүседип кирипкен ^[5].

Санкциялар

2023 чылдың февраль 23-те Ховалыгны АКШ-тың Күрүне департаментизи Американың санкциялыг даңзызынче киирген ^[6]

Өг-бүлези

Өглүг, үш ажы-төлдүг.

Шаңнал-макталдары

Найырал ордени (2022 чылдың ноябрь 28) — Тыва Республиканың социал-экономиктиг сайзыралынга улуг үлүг-хуузун кииргени дээш^[7].

Россия Федерациязының президентизиниң Өөрүп четтириишкин бижии (2012), Тыва Республиканың Баштыңының хүндүткел бижии (2013, 2018), медаль «Кызыл хоорайның сайзыралынга үлүг-хуузун кииргени дээш» (2017)^[8].

Дөзү

ХОВАЛЫГ Владислав Товарищтайович /Урянхайско-тувинская энциклопедия. II том (Л-Я). Под общей ред. Шойгу С.К., отв. ред. Бичелдей К.А. Кызыл: "Мир тувинцев", 2021. С. 508.

Демдеглелдер

[Кремль-1] Владислав Ховалыг назначен врио главы Республики Тыва (ru). Президент России.

[2] Тываның Чазааның сайтызында Владислав Ховалыгның допчу намдары

[Энц_ТАСС-3] Энциклопедия ТАСС, 2024. Ховалыг, Владислав Товарищтайович. Глава Республики Тыва

[4] Путин Тываның Чазааның баштыңындан Шолбан Кара-оолду хостааш, Владислав Ховалыгны томуйлаан

[5] Владислав Ховалыг Тыва Республиканың Чазак Даргазының хүлээлгелерин күүседип кирипкен

[6] Американың санкциялыг даңзызы

[7] Указ Президента Российской Федерации от 28.11.2022 № 866 «О награждении государственными наградами Российской Федерации»

[8] Владислав Ховалыгның намдары

[1]

[2]

[3]

[4]

[5]

[6]

[7]

[8]