Бавуу Маады Метпер оглу
| Бавуу Маады Метпер оглу | |
|---|---|
| тыв. Бавуу Маады Метпер оглу | |
| Төрүттүнгенде ады | Маады Метпер оглу Бавуу |
| Төрүттүнген ай-хүнү | 1921 |
| Төрүттүнген чери | Тарлаг, Бии-Хем кожуун, ТАР |
| Мөчээн ай-хүнү | 2 февраль 1944 |
| Мөчээн чери | Ровно, Украин ССР |
| Хамаатылалы |
.svg){kind=small} |
Бавуу Маады Метпер оглу (төрүттүнгенде ады — Маады Метпер оглу Бавуу, орус. Бавуу Маады Метпер оглу, 1921 чыл — 1944 чылдың февральдың 2) — Ада-чурттуң Улуг дайынының киржикчизи, тыва эки турачы эскадроннуң танкыга удур боолаар взводунуң гвардейжи анаа дайынчызы[1].
Допчу намдары
Бавуу Маады Метпер оглу 1921 чылда ТАР-ның Бии-Хем кожуунунуң Тарлаг сумузунга төрүттүнген.
1941 чылдан Тыва Араттың Революстуг Шериинге шериг албанын эрттирип турган. Пулемлётчик шериг мергежил чедип алган.
Ада-чурттуң Улуг дайынынга киржилгези
Тыва Арат Революстуг Намның Төп комитединиң секретариадының 1943 чылдың август 25-тен шиитпири-биле 2-ги тыва эки турачы отрядтың танкыга удур боолаар взводунуң анаа дайынчызы кылдыр томуйлаткан.
Тыва Арат Республикадан тыва эки турачылар отряды Барыын фронтунуң 6-гы аъттыг корпузунуң Морозов аттыг 8-ки гвардейжи аъттыг Ровно дивизиязының 31-ги гвардейжи аъттыг полкунуң составынче 4-кү эскадрон кылдыр кирген. Ооң составында 1000 километр орук чок черге 45 хонук дургузунда агаар-бойдус талазы-биле кончуг берге байдалдарда чоруп келген. Марш үезинде тывалар кижи-даа, аът-даа талазы-биле чидириг чок турган. Тыва чылгычылар походка шыдамык чоруун көргүскеннер.
1944 чылдың январьның 29-та 4-кү эскадроннуң тыва аъттыг шериглери Украин ССР-ниң Ровно облазының Деражно суур дээш тулчуушкуннарга баштай киришкен болгаш халдаашкынга төлептиг үлегер-чижекти көргүскен.
Бимба Түлүш танкыга удур боолаар взводтуң командылакчызы Бичен-оол Сарыгларның взводунуң гвардейжи анаа дайынчызы турган.
Ровно болгаш Дубно хоорайларны болгаш Украин ССР-ниң өске-даа чурттакчылыг черлерин хостаарынга эрес-дидим киришкен.
1944 чылдың февральдың 2-де Ровно хоорайны хостаар тулчуушкунга маадырлыы-биле өлген. Украинаның Ровно хоорайынынң чанында ха-дуңма чевээнде хөөржүттүнген.
Сактыышкын
Бии-Хем кожууннуң Аржаан сумузунда ооң тураскаалын тургускан.
Литература
• Сундуй М. Б. Эки турачы аъттыг эскадрон. Кызыл: Тываның ном үндурер чери, 1989.
• Книга Памяти. Респуб- лика Тыва. Кызыл, 1995.
• БАВУУ Маады Метпер оглу / Урянхайско-тувинская энциклопедия. I том (А-К). Под общей ред. Шойгу С. К., отв. ред. Бичелдей К. А. Кызыл: «Мир тувинцев», 2021. С. 162.
Демдеглелдер
Шөлүлгелер
• Постановление Правительства Республики Тыва О списках участников Великой Отечественной войны 1941—1945 годов, призванных из Тувинской Народной Республики
• Сундуй М. Б. Добровольный кавалерийский эскадрон