Владимир Путин-биле дорт дамчыдылга (2024)
| Владимир Путин-биле дорт дамчыдылга (2024) | |
|---|---|
 Россияның Президентизи Владимир Путин дорт дамчыдылга үезинде (2024) | |
| Баштай эрткен ай-хүнү | 2001 чылдың декабрьның 24 |
| Удаа-дараа болуру | чылдың-на |
| Организатору | Россияның президентизиниң администрациязы |
| Сайтызы | москва-путину.рф |
Владимир Путин-биле дорт дамчыдылга (2024) — Россия Федерациязының Президентизи Владимир Путинниң чылдың-на эрттирер дорт дамчыдылгалыг пресс-конференциязы. 2024 чылдың декабрьның 19-та дорт эфирге 4 шак 27 минут үргүлчүлеп болуп эрткен[1][2]. Телефон, СМС-медеглелдер, база Делегей четкизин дамчыштыр хамаатыларның киирген айтырыгларының саны 2,5 сая ажа берген[3].
Белеткел
2024 чылдың декабрь 8-тиң 00:00 шактан декабрь 19-ка чедир Россияның Президентизинге тускай мобильдиг капсырылга, смс-медеглелди ажыглап тургаш, телефон дамчыштыр, «ВКонтакте» болгаш «Одноклассники» социал четкилер таварыштыр база «Москва» деп сайт таварыштыр смс болгаш видео айтырыгларны хүлээп алган moscow-putinu.ru (Москва-Путин.рф)[4].
2024 чылда «Улусчу фронтунуң» штаб-квартиразында колл-центр ажылдакчылары хамаатыларның дилээн сайгарып көөрде, кылымал угаанны бир дугаар ажыглаан. Нейроннуг четки GigaChat социал четкилерде медээлерни, аудио медээлерни болгаш СМС-терни тускай темалар аайы-биле бөлүктээн[5].
2024 чылдың декабрь 11-де Владимир Путин Москвада Сберниң төп албан черинге чедип келгеш, Кылымал угаан талазы-биле сайзыралдың делгелгезин көрген. Ооң-биле чергелештир, GigaChat баш бурунгаар күрүне баштыңынга хамаатыларның дорт дамчыдылгага кандыг айтырыгларны хөйү-биле көдүрүп кээрин дыңнаткан:
Кандыг айтырыгларга белеткенир ужурлуг бис дээрзи билдингир-дир, оларның кол кезии: чуртталга бажыңнарының шынары болгаш өртээ, транспорт инфраструктуразы, эмнелге, күрүне албан черлери болгаш организациялар, деткимче акшалар[6].
2024 чылдың декабрь 19-туң байдалы-биле алырга, дорт дамчыдылгаже янзы-бүрү хевирлерде дилеглерниң саны 2,5 сая ажа берген[3]. Дилеглерниң саны-биле мурнакчылар Төп, Соңгу-Чөөн болгаш Чөөн Федералдыг округтар болган[7].
2024 чылдың түңнелдери
Дамчыдылганың кол темаларының аразында Россияның социал политиказы (дилеглерниң хуузу 20 %), чурттаар оран-сава-биле холбашкан айтырыглар (9 %), экономика (9 %), кадык камгалал (8 %), чуртталга-коммунал ажыл-агыйы (8 %) болгаш ТШО (6 %)[8].
Экономика
Күрүне баштыңы 2024 чылда экономиканың байдалын «турум болгаш бүзүрелдиг» деп демдеглээн, ВВП-ниң өзүлдезин 3,9 % хире деп санаан, а 2025 чылда 2,5 % болур деп баш бурунгаар чугаалаан. Ооң-биле чергелештир президент ону ЕС-тиң (ында 2024 чылда ВВП-нүң өзүлдези тик) болгаш АКШ-тың (6 % хире) байдалы-биле деңнээн. Оон аңгыда, ол Россияда ажыл чок чоруктуң рекордтуг эвээш деңнелинче (2,3 %) кичээнгейни угландырган. Владимир Путин Россия Федерациязының бүдүрүлгениң хемчээлиниң элээн көвүдээнин база демдеглээн, ол дээрге чурттуң бот догуннаан байдалын быжыглаанының демдээ-дир[8].
2024 чылда 9 % четкен инфляция дугайында чугаалап тура, президент ооң объективтиг болгаш субъективтиг чылдагааннары бар деп чугаалаан.[8]. Объективтиг чылдагааннар аразында:
- Россияда хереглелдиң өзүлдези;
- логистикага салдар чедирип турар делегейде өртектерниң өскени.
Субъективтиг чылдагааннар аразында:
- Төп банкының кол ставкага хамаарышпас инфляцияга салдар чедирер херекселдерни үезинде ажыглавааны;
- чамдык ажыл-агыйны хөгжүдер талазы-биле Россияның чазааның үезинде хемчег албайн турары[8].
Президент Россияның чаа деп адаар регионнарының экономиктиг байдалын аңгы тайылбырлап, ЛНР-де (90 % өскен), ДНР-де (79 %), Херсон биле Запорожье областьтарга чыгдынган үндүрүглерниң өскенин демдеглээн (200 %).
ТШО
ТШО зоназында байдал дугайында айтырыгга харыылаарының мурнунда, Владимир Путин далай чадаг шерииниң гвардейжи 155-ки аңгы бригадазының тугун ооң төлээлери аңаа сунганын чугаалааш, ону студияга көдүрерин дилээн, ол ышкаш оларга аас-кежикти, тиилелгени болгаш бажыңынче бүдүн-бүрүн чанып кээрин күзээн. Күрүне баштыңының чугаазы-биле алырга, хүн бүрүде шериг албанныглар бүдүн фронтунуң шугуму-биле бурунгаарлап, «дөрбелчин километр» девискээрни хостап турар[8]. Курск облазының чурттакчызы-биле чугаа үезинде, Украинаның Чепсектиг Күштерин Россияның кызыгаардан кажан үндүр сывырарын айтырган, президент «оолдар тулчуп турар, амдыызында тулчуушкун чоруп турар, бис оларны ыяап-ла бүрүнү-биле узуткаар бис» деп харыылаан[8]. Курск облазында үрелген техниканың саны 2023 чылда бүдүн фронту дургаар үрелген танкыларның, чадаг шеригниң дайынчы техниказының болгаш өске-даа чүүлдерниң санын ажа бергенин Россияның удуртукчузу демдеглээн. Ооң-биле чергелештир Владимир Путин шупту үрелген хамааты болгаш социал объектилерни катап тургузарын, бажыңнарын болгаш квартираларын чидирген хамаатыларга чурттаар оран-сава алыр сертификаттарны бээрин аңаа 108 млрд рубльди тускайлаан. Оон аңгыда Херсон, Запорожье областьтарны, ЛНР биле ДНР-ни катап тудуп тургузарының дугайында чугаа чоруп турган. Ылаңгыя, үш чыл дургузунда ол регионнарның орук четкизин стандарт байдалче киирер, Азов далайны долгандыр дөрт полосалыг кольцевой автомагистральды тудар[9]. 20 муң ажыг социал объектилер болгаш чурттаар оран-сава катап тургустунган[8].
Владимир Путин «Маадырларның үези» деп программаның күүселдезин онзалап чугаалаан, ооң ачызында ТШО-нуң киржикчилеринден кадрлар курлавырын белеткеп турар. Ындыг курстарны тургузарының дугайында бодал аңаа тускай шериг операциязынга киржип турар студентилер-биле ужуражылга соонда тыптып келген. Ооң чугаазы-биле алырга, шериг албанныгларның аразындан улуг компанияларны, муниципалдыг тургузугларны, яамылар болгаш ведомстволарны удуртур кижилерни шилип алыр херек:
Мында чаңгыс-даа частырыг чок… Хөй улуска ам безин ажылдаар саналдар кээп эгелээн, олар бизнесче, бүгү деңнелдиң күрүне органнарынче ажылдап кирип турар[8].
Владимир Путин база-ла ТШО-ну эгелээр дугайында шиитпирни эртежик хүлээп алгаш, аңаа эки белеткенип алыр ужурлуг турганын чугаалап, үш чыл дургузунда тускайлаттынган шериг операциязы ону канчаар өскерткенин үлешкен:
Мен каттыранчыг чүве чугаалаарын эвээжедип, каттырарымны соксадып турар апарган мен.[8].
Стратегтиг камгалал
Барыын чүктүң медээ четкилериниң НАТО «Орешниктиң» халдаашкынын чайладып шыдаар бе дээрзинге хамаарышкан чугааларынга Владимир Путин эксперимент кылырын саналдаан:
Барыын чүк биле Украина Киевте девискээрни тодарадып көрзүн, оларның шупту ПВО системаларын аңаа чыып алыр, бис аңаа Орешникти ажыглаар бис, олар ону узуткаарын оралдажыр, оон чүү болурун көөр бис[8].
Бо ортумак ырактыг баллистиктиг ракетага чүге ындыг ат шилип алганының дугайында Президент мынча дээн: «Шыны-биле билбес мен»[9].
Делегей байдалынга хамаарыштыр
Дорт дамчыдылга үезинде Владимир Путин делегейде байдалга хамаарышкан элээн каш айтырыгларга харыылаан. Ылаңгыя, ол Сирияның чиңгине президентизи Башар Асад Москваже көжүп келгениниң соонда ооң-биле ам-даа ужурашпаанын чугаалаан, база Россияның Сирияга салган сорулгалары чедип алдынган деп демдеглээн, чүге дизе Россияның Чепсектиг Күштери «террорчу анклавтың» аңаа тыптып кээринге шаптыктаан.[8]. NBC-ден корреспондентиниң «Россия ТШО-нуң сорулгаларын чедип албаан, генералдарын чидирип турар, кошкап турар» деп чугаазын тайылбырлап тургаш, Россияның президентизи Россия харын-даа сөөлгү чылдарда бодунуң экономиказын, бот догуннаан байдалын болгаш камгаланыр аргаларын быжыглаан деп чугаалаан:
Силер Россияның кошкак байдалга турарын күзеп турар силер, ынчалза-даа мен өске көрүштүг мен[9].
Кыдаттың Синьхуа медээ агентилелиниң төлээзи Россияның удуртукчузундан Россия Федерациязы биле КАР-ның аразында кады ажылдажылганың деңнелин үнелээрин дилээн. Путин ийи чурттуң аразында садыг-саарылга орулгазы 200 млрд доллар четкенин, инвестиция төлевилелдериниң саны 600 болганын, регионнар деңнелинге харылзаа база көвүдээнин чугаалаан.
Социал политика
Президент Россияга демографтыг айтырыгны эң чугула айтырыгларның бирээзи деп адаан, чүге дизе төрүттүнериниң деңнели кончуг куду деңнелче — 1,41 % чедир бадып, божуур назылыг херээженнерниң саны 30 % эвээжээн. Владимир Путинниң бодалы-биле алырга, төрүттүнериниң санын эвээш дизе 2,3 %[9] чедир өстүрер ужурлуг. Чазактың деткимче хемчеглеринге хамаарыштыр президент ие капиталының программазын, өг-бүлениң ипотека программазын база ажы-төлдүг өг-бүлелерге чаңгыс аай пособие төлевирин демдеглээн[8].
Демографиязы дыка бедик байдалда турар регионнарга Владимир Путин Тыва болгаш Чечен республикаларны демдеглеп чугаалаан.
«Күрүне баштыңы миграция политиказының айтырыын „дыка нарын“ деп адаан. Ооң бодалы-биле алырга, Россияда көжүп келген кижилерниң санын эвээжедири-биле күш-ажылдың бүдүрүкчүлүүн бедидер, ажыл-чорудулганың бедик технологиялыг адырларынче кичээнгейни угландырар херек. Россияже ажылдап келген улуска негелделерни шыңгыырадыр, даштыкы хамаатылар Россия Федерациязының культурлуг онзагайларын билип, дылын билир кылдыр өөредилге компонентизин бедидери база чугула»[8].
Кадык камгалал адыры
Владимир Путин Нижний Новгородтуң чурттакчызының эмнелгелерде кадрлар чедишпезиниң дугайында айтырыынга харыылаан. Ооң чугаазы-биле алырга, эмчилерниң эң-не чидиг чедишпес адыры — бирги эмчи дузазында, а ол талазы-биле тус чер эрге-чагыргаларының мурнунга аныяк кадрларны хаара тудар, ол ышкаш ажылды шын үлеп бээр сорулга тургустунуп келген. Оон аңгыда дорт дамчыдылга үезинде олар фармацевтика адырының хөгжүлдезин болгаш чурт бодунуң эмнерин бүдүрерин сайгарган[8].
Делегей четкизи
Блоггер Влад А4 Владимир Путинден Россияда YouTube-туң оожум апарганының дугайында бодалын айтырган. Күрүне баштыңы платформаның ээзи Google компания Россия Федерациязында бодунуң салбырларга акшаландырыышкынны эвээжедип, дериг-херекселдерниң хандырылгазын кызыгаарлаан, ооң уржуунда серверлериниң ажылдаары баксыраан[8].
Политиктер дугайында
Дорт дамчыдылга үезинде Владимир Путин Россияда болгаш даштыкы чурттарда элээн каш политиктерниң дугайында чугаалаан. Ылаңгыя кым-биле шай ижип олурган болзумза деп бодаар силер деп айтырыгга харыылап тура, Гельмут Кольду сактып чугаалаан:
Мен канцлер Коль-биле ужуражыр ийик мен… ол Германияга хөйнү кылган политиктиг кижи турган[8].
Оон аңгыда Владимир Жириновскийни сактып, ооң Украина, Чоокку Чөөн чүк дугайында бүде берген баш бурунгаар сагыш-бодалдарын чугаалаан:
Ол эпатажка ынак чораан, ынчалза-даа дыка эртемниг болгаш шыырак белеткелдиг кижи турган. Ынчангаш ооң баш бурунгаар чугаазы боттанып турар боор: ооң бодалдары херек кырында арга-дуржулгага болгаш билиглерге үндезилеттинген турган.[8].
Борис Ельцин Дугайында:
Барыын чүкте Ельцинге дыка ынак турган, ынчалза-даа ол Барыын чурттар Белградты чазылдырып эгелээнде аңаа удур сөс ап чугааланган соонда-ла ону дораан истеп-сүрүп, арагачы чүве деп эгелээннер[9].
Зеленскийниң келир үезиниң дугайында:
Амгы үеде бараан болуп турар кижилери соонда ону хүлээп алыр[9].
Анекдот от президента
Программа үезинде Россияның иштики бергедээшкиннериниң дугайында хөй бодаары чугула деп чүүлдү сагындырып тургаш, президент бир анекдот чугаалаан:
Өг-бүле столда олурар. Оол авазындан айтырар: «Кроссвордта үш үжүктен тургустунган сөс кандыг-дыр?» Оон мурнунга ложка-биле соккан. Дараазында, кадайы мурнунга соккан, бо удаада ашаандан. «Бажың дугайында боданыр херек» — деп, ол чугаалаан.[9].
Демдеглелдер
- ↑ Прямая линия и пресс-конференция Путина длились почти 4,5 часа - Российская газета (2024-12-19). Хынаан 20 декабрьның 2024.
- ↑ Прямая линия Путина состоится 19 декабря (06.12.2024). Хынаан 6 декабрьның 2024.
- ↑ 1 2 На прямую линию с Путиным поступило более 1,8 миллиона обращений (18.12.2024). Хынаан 19 декабрьның 2024.
- ↑ 19 декабря в 12:00 по московскому времени в эфир выйдет программа «Итоги года с Владимиром Путиным» (07.12.2024). Хынаан 8 декабрьның 2024.
- ↑ В call-центре прямой линии Путина рассказали об анализе обращений с помощью ИИ (2024-12-10). Хынаан 10 декабрьның 2024.
- ↑ ИИ подсказал Путину, к каким вопросам на прямой линии уже можно готовиться (11.12.2024). Хынаан 11 декабрьның 2024.
- ↑ Число обращений на прямую линию Путина превысило полмиллиона (12.12.2024). Хынаан 12 декабрьның 2024.
- ↑ 1 2 3 4 5 6 7 8 9 10 11 12 13 14 15 16 17 Итоги года с Владимиром Путиным (19.12.2024). Хынаан 19 декабрьның 2024.
- ↑ 1 2 3 4 5 6 7 Итоги года с Владимиром Путиным. Онлайн-репортаж (19.12.2024). Хынаан 19 декабрьның 2024.
Бо чүүлче РУВИКИ-ниң өске чүүлдеринден шөлүлгелер чок. |
.svg){kind=link}