Дагба Оюн Эңдерикпей оглу

Дагба Оюн Эңдерикпей оглу
тыв. Дагба Оюн Эңдерикпей оглу
Төрүттүнгенде ады	Оюн Эңдерикпей оглу Дагба
Төрүттүнген ай-хүнү	1909(1909)
Төрүттүнген чери	Ээрбек, Таңды кожуун, Таңды Урянхай
Мөчээн ай-хүнү	2 февраль 1944(1944-02-02)
Мөчээн чери	Ровно, Украин ССР

Дагба Оюн Эңдерикпей оглу (төрүттүнгенде ады — Оюн Эңдерикпей оглу Дагба, орус. Дагба Оюн Эңдерикпей оглу, 1909 чыл — 1944 чылдың февральдың 2) — Ада-чурттуң Улуг дайынының киржикчизи, тыва эки турачы эскадроннуң танкыга удур боолаар взводунуң гвардейжи анаа дайынчызы.

Допчу намдары

Дагба Оюн Эңдерикпей оглу 1909 чылда ТАР-ның Таңды кожуунунуң Ээрбек сумузунга төрүттүнген.

1930–1933 чылдарда Москвага ТАР-ның бүрүн эргелиг төлээлел черинге очулдурукчулап ажылдап турган.

1934 чылда Чөөн чүктуң ажылчын чонунуң коммунистиг университедин дооскан.

1934–1939 чылдарда Тыва Араттың Революстуг Намының комитединиң Каа-Хем кожуунда килдизиниң эргелекчизи кылдыр ажылдап турган.

Ада-чурттуң Улуг дайынынга киржилгези

Тыва Арат Революстуг Намның Төп комитединиң секретариадының 1943 чылдың август 25-тен шиитпири-биле 2-ги тыва эки турачы отрядтың 5-ки взводунуң анаа дайынчызы кылдыр томуйлаткан.

Тыва Арат Республикадан тыва эки турачылар отряды Барыын фронтунуң 6-гы аъттыг корпузунуң Морозов аттыг 8-ки гвардейжи аъттыг Ровно дивизиязының 31-ги гвардейжи аъттыг полкунуң составынче 4-кү эскадрон кылдыр кирген. Ооң составында 1000 километр орук чок черге 45 хонук дургузунда агаар-бойдус талазы-биле кончуг берге байдалдарда чоруп келген. Марш үезинде тывалар кижи-даа, аът-даа талазы-биле чидириг чок турган. Тыва чылгычылар походка шыдамык чоруун көргүскеннер.

1944 чылдың январьның 29-та 4-кү эскадроннуң тыва аъттыг шериглери Украин ССР-ниң Ровно облазының Деражно суур дээш тулчуушкуннарга баштай киришкен болгаш халдаашкынга төлептиг үлегер-чижекти көргүскен.

Дагба Оюн танкыга удур боолаар взводтуң командылакчызы Бичен-оол Сарыгларның взводунуң гвардейжи анаа дайынчызы турган. Украин ССР-ниң Ровно хоорайын хостаар тулчуушкунга 1944 чылдың февральдың 2-де чок болган.

Литература

• Сундуй М. Б. Эки турачы аъттыг эскадрон. Кызыл: Тываның ном үндурер чери, 1989.
• Книга Памяти. Республика Тыва. [cост. Н. М. Моллеров]. Кызыл, 1995.
• ДАГБА Оюн Эндерикпей оглу / Урянхайско-тувинская энциклопедия. II том (Л-Я). Под общей ред. Шойгу С.К., отв. ред. Бичелдей К.А. Кызыл: "Мир тувинцев", 2021. С. 272.

Демдеглелдер

Шөлүлгелер

• Постановление Правительства Республики Тыва О списках участников Великой Отечественной войны 1941—1945 годов, призванных из Тувинской Народной Республики
• Сундуй М. Б. Добровольный кавалерийский эскадрон